Kombëtarja U17 e Kosovës në konkurrencën e vajzave ka arritur një tjetër sukses të rëndësishëm, duke siguruar kalimin në Ligën A për kualifikimet e Kampionatit Evropian 2026.
Të përzgjedhurat e Sanije Krasniqit e përfunduan ciklin kualifikues në pozitën e dytë të Grupit B të Ligës B, me pikë të barabarta me kombëtaren e Uellsit.
Kjo e fundit u kualifikua direkt si fituese e grupit falë goldallimit më të mirë, ndërsa Kosova e ruajti shpresën për kalim përmes pozitës së dytë më të mirë në grupet e Ligës B, gjë që u konfirmua sot pas humbjes së Sllovenisë ndaj Islandës (0:3).
Dardanet U17 zhvilluan një paraqitje mbresëlënëse gjatë këtij cikli të Ligë B, që u mbajt muajin e kaluar në Moldavi, duke mposhtur Moldavinë me rezultat 1:0 dhe Azerbajxhanin me shifrat bindëse 6:0, ndërsa barazuan me Uellsin 1:1 në ndeshjen vendimtare për kreun e grupit.
Kësisoj, Kombëtarja e Kosovës U17 në konkurrencën e vajzave për herë të katërt radhazi arrin të kalojë nga Liga B në Ligën A, një dëshmi e progresit të vazhdueshëm të futbollit të vajzave në vendin tonë dhe e punës së përkushtuar të stafit teknik dhe lojtareve të reja dardane.
