Zëdhënësi i Aleancës, Kushtrim Xhemaili ka denoncuar një fushatë të pretenduar shpifjesh dhe kërcënimesh në rrjetet sociale ndaj figurave të kësaj partie, Ramush dhe Daut Haradinajt.
Përmes një postimi në Facebook, Xhemaili ka thënë se ditëve të fundit dhjetëra profile të rreme në rrjetet sociale po shpërndajnë informacione të pavërteta dhe përmbajtje që, sipas tij, kanë kaluar edhe në kërcënime të drejtpërdrejta për jetën.
Ai ka veçuar një profil me emrin “Besmir Kelmendi”, i cili, sipas Aleancës, përdor fotografinë e Avni Rrustemit dhe emrin “Avni Rrustemi 2.0”. Sipas Xhemailit, ky profil ka bërë thirrje publike për vrasjen e Ramush dhe Daut Haradinajt.
Më tej, ai ka pretenduar se përmes këtij profili po tentohet të ndërlidhet qëllimisht familja Haradinaj me rastin tragjik në Pejë, ku mbeti e vrarë Arlinda Zekaj nga kunati i saj, duke përdorur pretendime dhe citate të pavërteta.
Xhemaili ka bërë të ditur se Aleanca ka dorëzuar në Policinë e Kosovës dhe organet e drejtësisë të dhënat dhe provat që posedon për këtë profil dhe llogaritë e tjera që i konsideron të ndërlidhura me të.
Në reagimin e tij, ai ka kritikuar edhe deklaratat e disa deputetëve të partisë në pushtet, duke i cilësuar si mbështetje për atë që e quan fushatë linçimi dhe kërcënimi online.
Në fund, Xhemaili ka theksuar se tragjeditë njerëzore nuk duhet të përdoren për përfitime politike apo për nxitje të dhunës, duke paralajmëruar se Aleanca do të ndjekë rrugën ligjore ndaj të gjithë personave që qëndrojnë prapa këtyre kërcënimeve./teve1.info/
