Duke festuar golin në formën e një pirati, duke e mbyllur syrin me dorë, Vedat Muriqi sulmuesi i Mallorcas është përzgjedhur krahas Raphinhas së Barcelonës për të paralajmëruar në rrjetet sociale, sezonin e ri të kampionatit spanjoll, La Liga, që nis nga e premtja.
Mallorca – Barcelona është ndeshja kryesore e xhiros së parë e cila luhet të shtunën nga ora 19:30, derisa Muriqi me nofkën “Pirati” simbolizon klubi nga ishulli që ndeshet me kampionin aktual të Spanjës.
Gjiganti i sulmit të Kosovës ka ditur t’i shkaktojë probleme katalunasve, derisa në ligën spanjolle ai është futbollisti më i rrezikshëm në zonë, nga topat në ajër.
Natyrisht se Barça është favorite, por në edicionin e kaluar, në xhiron e parë, Mallorca e dëshpëroi Real Madridin, duke e mposhtur në nismë të La Ligas.
