Adelina Hasani, studiuese e marrëdhënieve ndërkombëtare ka reaguar pas vrasjes së Arlinda Zekajt, duke kërkuar që dhuna ndaj grave në Kosovë të trajtohet si urgjencë kombëtare dhe jo vetëm kur ndodhin raste tragjike.
Ajo ka kritikuar institucionet për reagimin vetëm pasi ndodhin vrasjet apo rastet e dhunimit, duke theksuar se në Kosovë janë 155 raste me rrezikshmëri të lartë.
“Në Kosovë merremi me rastet e vrasjes së grave dhe dhunimeve vetëm kur ndodhin raste. Kjo është e tmerrshme. Janë 155 raste me rrezikshmëri të lartë në Kosovë. Shteti duhet të bëjë raportim të vazhdueshëm për të gjitha rastet”, ka deklaruar Hasani për emisionin “Këndi i Debatit” në Tëvë1.
Hasani ka thënë se edhe vetë, si grua, vazhdon të ndihet e kërcënuar, duke kërkuar që institucionet ta trajtojnë këtë çështje me urgjencë.
“Edhe unë si grua vazhdoj të jem e kërcënuar. Çdo ditë jam në rrugë. Kjo çështje duhet të trajtohet si urgjencë kombëtare”, ka theksuar ajo.
