Presidenti i Serbisë, Aleksandar Vuçiq, ka thënë se sot është një ditë e feste e Vidovdanit për Serbinë, edhe pse është 23 maj, dhe jo 28 qershor.
Sipas tij, sot do të bëhet e qartë kush nuk ishte i frikësuar dhe kush qëndron në anën e drejtësisë.
“Na takon neve të luftojmë. Mendoj se kemi bërë më të mirën. Kam folur deri më tani me përfaqësues të më shumë se 147 vendeve”, tha Vuçiq për TV Informer me rastin e seancës së sotme të Asamblesë së Përgjithshme të OKB-së, ku pritet votimi i propozim rezolutës për Srebrenicën, shkruan Tanjug.
Asambleja e Përgjithshme e Kombeve të Bashkuara voton sot për një propozim-rezolutë për gjenocidin në Srebrenicë.
Debati për të pritet të nisë në orën 16:00.
Rezoluta, e cila propozon që 11 korriku të shpallet Ditë Ndërkombëtare e Përkujtimit të Viktimave të Gjenocidit të Srebrenicës, si dhe dënon mohimin e gjenocidit dhe madhërimin e kriminelëve të luftës, u sponsorizua nga tridhjetë vende. Propozueset zyrtare të saj ishin Gjermania dhe Ruanda.
Mbështetje për të, deri më tash, shprehën të gjitha vendet e Ballkanit Perëndimor, përveç Serbisë dhe entitetit serb të Bosnje e Hercegovinës, Republika Sërpska.
