Instituti Demokratik i Kosovës (KDI) ka dënuar ashpër përpjekjet për të vazhduar me zgjedhjen e Presidentit pa përmbushjen e kuorumit të kërkuar kushtetues, duke e cilësuar këtë veprim si cenim të drejtpërdrejtë të rendit kushtetues dhe demokracisë parlamentare.
Sipas KDI-së, vendimet dhe praktika e Gjykatës Kushtetuese të Kosovës kanë sqaruar qartë standardet që duhet ndjekur gjatë procedurës së zgjedhjes së Presidentit.
“Zgjedhja e Presidentit kërkon pjesëmarrjen e së paku dy të tretave të të gjithë deputetëve në raundin e parë dhe të dytë të votimit, ndërsa vetëm pas përmbushjes së këtij kushti procedura vazhdon në raundin e tretë”, thuhet në reagim.
Instituti ka theksuar se çdo tentativë për të anashkaluar këtë rend dhe për të zgjedhur Presidentin me një numër të kufizuar deputetësh përbën shkelje të hapur të Kushtetutës dhe deformim të qëllimshëm të parimeve kushtetuese.
Sipas tyre, nuk ekziston asnjë bazë juridike që lejon uljen e kuorumit për shkak të mungesës së deputetëve.
KDI ka vlerësuar se kjo qasje krijon precedent të rrezikshëm dhe mund të hapë rrugë për interpretime të njëanshme të rregullave kushtetuese.
“Prandaj, KDI u bën thirrje deputetëve që të respektojnë standardet kushtetuese dhe të shmangin veprime që thellojnë krizën institucionale. Po ashtu, atyre u bëjmë thirrje edhe që të ndalojnë çdo veprim që cenon rendin kushtetues dhe të rikthehen në respektimin e plotë të procedurave kushtetuese”, theksohet në fund të reagimit./teve1.info/
