Dy projektligjet, ai për Energjinë dhe ai për Energjinë Elektrike, nuk kanë arritur të përfshihen në rendin e ditës në seancën e sotme të Kuvendit të Kosovës, pasi mocionet për ndryshimin e agjendës nuk morën votat e nevojshme të deputetëve.
Projektligji për Energjinë mori 63 vota për dhe 47 kundër, ndërsa ai për Energjinë Elektrike mori 63 vota për dhe 51 kundër, duke mos e kaluar pragun e kërkuar për futje në rend dite.
Para votimit, ministrja e Ekonomisë Artane Rizvanolli deklaroi se projektligjet kanë kaluar konsultimet publike më shumë se 16 muaj më parë dhe sipas saj ka pasur kohë të mjaftueshme për analizim dhe shqyrtim.
Ajo paralajmëroi se mosmiratimi i tyre mund t’i kushtojë Kosovës humbjen e rreth 9 milionë eurove nga Plani i Rritjes, duke theksuar se këto ligje janë kusht për përfitimin e mjeteve dhe duhet të miratohen brenda afateve të përcaktuara.
Rizvanolli shtoi se vonesat mund të vështirësojnë edhe menaxhimin e krizave të mundshme energjetike në të ardhmen.
Në seancë, ministrja mbrojti ndryshimet e propozuara duke thënë se ato janë në përputhje me direktivat evropiane dhe përmirësojnë kornizën ligjore të sektorit energjetik, ndërsa kritikoi pretendimet për dëmtim të sistemit.
Nga ana tjetër, kryetari i Bedri Hamza i Partisë Demokratike të Kosovës e ka akuzuar Qeverinë për vonesë në procedimin e ligjeve, duke theksuar se, sipas tij, procesi është dashur të nisë më herët dhe jo në mënyrë të përshpejtuar në këtë fazë.
