Të paktën një person vdiq dhe tetë të tjerë, përfshirë një fëmijë, u plagosën në sulmet e fundit ruse me dronë dhe raketa në Ukrainë, tha sot presidenti Volodymyr Zelensky.
“Objektivi kryesor i sulmit ishte furnizimi me energji, por ndërtesat e zakonshme të banimit u dëmtuan gjithashtu, dhe pati dëme në hekurudhë,” tha ai në Telegram.
“Një burrë 49-vjeçar u vra në rajonin e Kievit ndërsa Rusia lëshoi pothuajse 300 dronë dhe 50 raketa drejt Ukrainës”, shtoi Zelensky.
Përveç Kievit, zonat si, Dnipropetrovsk, Kirovohrad, Mykolaiv, Odesa, Poltava dhe Sumy u prekën gjithashtu.
“Moska vazhdon të investojë më shumë në sulme sesa në diplomaci”, tha Zelensky, duke iu referuar negociatave të vazhdueshme midis vendeve ndërluftuese.
“Vetëm këtë javë, Rusia dislokoi mbi 1 300 dronë luftarakë, më shumë se 1 400 bomba rrëshqitëse dhe 96 raketa”, sipas presidentit ukrainas.
“Kjo është arsyeja pse ne duhet të forcojmë mbrojtjen tonë ajrore”, theksoi Zelensky, duke shtuar se Ukrainës i duhen sisteme që mund t’i përgjigjen raketave balistike, transmeton ATSH.
“Çdo paketë e tillë mbron infrastrukturën e rëndësishme dhe ruan normalitetin e jetës”, tha ai.
Ukraina i ka rezistuar pushtimit rus në shkallë të plotë për gati katër vjet me ndihmën e vendeve perëndimore. E marta, më 24 shkurt, do të shënojë përvjetorin e katërt të luftës së Rusisë në Ukrainë.
