Vitin e ri e nisi me një vizitë në Ballkan.
E ndalesën e parë e pati në Prishtinë.
I dërguari i posaçëm nga Bashkimi Evropian për dialogun Kosovë – Serbi, gjatë kësaj jave u prit në takim nga e para e shtetit, Vjosa Osmani dhe kryeministri në detyrë, Albin Kurti.
Nga kjo vizitë e tij, besohet se u dha mesazhi që e vetmja rrugë për Kosovën e Serbinë, është rikthimi në tavolinën e bisedimeve.
“Besoj është një shtytje, ose një përpjekje për t’i dhënë një imputo të ri dialogut për normalizimin e marrëdhënieve mes Kosovës dhe Serbisë. Dialogu i cili nuk ka qenë prioritet. Sa do t’ia dalë përfaqësuesi special i BE-së për dialogun që ta kthejë në agjendën e prioritetev, besoj se varet sa shpejt do të krijohen institucionet e Kosovës por gjithashtu do të varet sa do të jetë angazhimi i Shteteve të Bashkuara të Amerikës në procesin e dialogut”, deklaroi profesori i shkencave politike, Avdi Smajljaj.
Sipas profesorit të shkencave politike, Avdi Smajljaj, angazhimi i SHBA-së në dialog vetëm sa do t’ua lehtësonte palëve integrimin në BE.
“Riangazhimi i SHBA-së në këtë proces është i domosdoshëm për t’i dhënë një energji të re dialogut, për normalizim të raporteve midis këtyre dy vendeve, që është edhe kushti i vetëm për udhëtimin drejt integrimit në Bashkimin e Evropian”, tha ai.
Në anën tjetër, njohësi i çështjeve politike, Tomorr Avdiu, thotë se gjatë vitit 2025 kishte prolongim të dialogut, andaj sipas tij, Sorensen kërkoi intensifikim dhe ritëm të shpejt të procesit.
“Është një vizitë e cila parimisht ka dy qëllime; qëllimi i parë është që palët të lëvizin drejtë kontakteve për të shtyrë dialogun dhe e dyta është që ky dialog të ketë rritje të ritmit të duhur, që do të thotë të ketë shpejtësi të veprimit të kontakteve, ule të perceptimit të dosjeve që kanë mbetur të pahapura nga vitit 2025 pasi që kemi kaluar një periudhë transitore të rëndë të zgjedhjeve”.
Pas Kosovës, për një vizitë të tillë, emisari i BE-së udhëtoi edhe për në Beograd.
