Selektori i Zvicrës, Murat Yakin ka mohuar mundësinë që ndeshja Kosovë – Zvicër të jetë “duel vëllazëror”.
“E kemi lënë aspektin emocional prapa vetes. Nuk ka duel vëllazëror nesër. Duhet të fillojmë furishëm. Kosova kaloi herët në epërsi ndaj Suedisë dhe Sllovenisë. Ne duam të luajmë lojën tonë dhe të provojmë të shënojm gola”, ka thënë Yakin.
Murat Yakin ka folur për herë të dytë në konferencë për shtyp për Granit Xhakën.
“Nuk e kam pritur kthimin e Granit Xhakës në Premier League. Është e pabesueshme ajo që po arrinë me Sunderlandin e promovuar. Graniti është lider, luftëtar dhe kjo është shumë e rëndësishme për ndeshjen e nesërme. Sa i takon Xherdan Shaqirit – statistikat e tij te Baseli janë të pabesueshme. Por kemi lojtarë të mirë në pozitën e tij: Ndoye, Vargas, Manzambi, pa harruar Sanchesin”, deklaroi Yakin.
Zvicra i shënoi katër gola ndaj Kosovës në Basel në shtator. Por më pas Kosova nuk pranoi gol në katër ndeshje rresht, dy me Suedinë dhe dy me Slloveninë.
“Jemi të lumtur që kemi shënuar katër gola ndaj Kosovës. Por më pas ajo e ndryshoi sistemin shumë. Kosova është e dyta në tabelë dhe mund të luajë pa asnjë presion. Nuk ka çka të humbë. Kam ekip që dëshiron të shënojë gola dhe të luajë lojë dominante”, ka thënë selektori i Zvicrës, Murat Yakin.
Ai ka thënë se nuk ka nevojë të bëjë shumë ndryshime në formacion. Ka thënë se Kosova duhet t’i përshtatet mënyrës së lojës së Zvicrës.
Yakini ndihet me fat që e ka bankën e rezervistëve të fortë.
Ndonëse Zvicra fitoi 4:0 ndaj Kosovës në Basel në shtator, portieri i helvetikëve, Gregor Kobel, ka lavdëruar “Dardanët”.
“Nuk jemi të befasuar që Kosova është kaq lartë në tabelë.
Në Basel ne kemi luajtur shumë mirë në pjesën e parë, por mbi të gjithë ishim shumë efikasë. Gjithsesi, Kosova është rikuperuar mirë nga humbja dhe ka shpirt të mirë ekipor”, ka theksuar Kobel.
Portieri i Zvicrës, Gregor Kobel është pyetur për Fisnik Asllanin në konferencën për shtyp në Prishtinë.
“Natyrisht analizimi i lojtarëve është gjithnjë pjesë e përgatitjeve. E kam parë që është në formë të mirë. Si portier, forma nuk është gjëja kryesore. Dua të identifikojë mënyrën e lojës. Natyrisht, shikon për një ose dy lojtarë. Por kryesisht është analizë e gjithë ekipit”.
