Selektori Murat Yakin ka uruar tifozët e Zvicrës për kualifikimin në Kupën e Botës 2026, pasi është më se i sigurt se nuk do të marrin gjashtë gola nga Kosova.
Matematikisht, Kosova ende është në garë për kualifikim direkt megjithatë duhet të fitojë së paku 6-0 në Prishtinë, në duelin e fundit të Grupit B, të martën mbrëma.
Yakin në anën tjetër është i sigurt se nuk ka gjasa që të ndodhë kjo, pavarësisht arritjes së madhe që ka bërë Kosova.
“Nuk e kemi finalizuar 100 për qind. Është turp sepse donim të festonim me tifozët këtu. Nuk po mendojmë të humbasim, kjo skuadër kërkon vetëm fitore dhe kështu po luajmë. Nuk do të pranojmë gjashtë gola. Në futboll, asgjë nuk është e pamundur, kemi parë shumë. Por, personalisht kurrë nuk kam pasur një eksperiencë të tillë dhe nuk dua ta kem”, tha tekniku zviceran
Yakin, gjithashtu pret që përballja në Prishtinë të jetë mjaftë e vështirë. Zvicra, të shtunën mbrëma mposhti Suedinë 3:1 për ta forcuar pozitën e parë në grup me 13 pikë, tri më shumë se Kosova.
“Do të provojnë të na provokojnë dhe të na mërzisin. Por, nuk do t’i lejojmë. Jemi shumë të mençur, mirë dhe me eksperiencë”, deklaroi Yakin.
Ndeshja Kosovë – Zvicër, zhvillohet të martëm mbrëma në stadiumin “Fadil Vokrri” me fillim nga ora 20:45.
