Prishtina ka zyrtarizuar sot ardhjen e përforcimit të ri amerikan, Eric Williams Jr., një lojtar i njohur për fizik, energji dhe aftësi të forta në dy pozitat 2/3.
Williams është 1.98 cm i gjatë dhe pritet t’i japë Prishtinës shtytje të rëndësishme për vijimin e kampionatit.
Amerikani vjen nga elita qipriote, ku këtë sezon ka luajtur për Keravnos përfshirë edhe fazën e grupeve në FIBA Europe Cup, me mesatare prej 11.6 pikësh, 4.2 kërcimesh dhe 2 asistimesh për ndeshje – një kontribut i rëndësishëm në një prej kampionateve të forta ndërkombëtare.
Karriera e tij përfshin përvoja edhe në disa shtete, përfshirë Meksikën, Anglinë, Poloninë, Republikën Dominikane etj, ku është dalluar si lojtar i gjithanshëm dhe i disiplinuar.
Në NCAA, Williams ka pasur një karrierë të pasur kolegjiale, duke luajtur për Oregon Ducks, San Diego Toreros dhe Duquesne Dukes, ekipe me traditë në basketbollin amerikan.
Ky transferim mund të forcojë ndjeshëm ekipin e Prishtinës, teksa skuadra synon të rikthehet në garë për objektivat e sezonit.
