Federata e Futbollit e Kosovës e ka publikuar orarin e ndeshjeve të javës 29 në Superligë, e cila sjell përballje mjaft interesante.
Pa dyshim vëmendja kryesore është përqendruar te dueli ndërmjet Llapit e Prishtinës, që pritet të zhvillohet të shtunën në Podujevë.
Kjo përballje, e cila luhet nga ora 15:00 në stadiumin “Zahir Pajaziti”, konsiderohet si ndeshja kryesore e xhiros, duke pasur parasysh rivalitetin tradicional dhe rëndësinë e pikëve në këtë fazë të kampionatit.
Llapi synon të shfrytëzojë terrenin vendas për të marrë një fitore të madhe, ndërsa Prishtina udhëton me objektivin për të mos dalë duarbosh nga Podujeva.
Në të njëjtën ditë, një tjetër përballje zhvillohet në Ferizaj, ku skuadra nikoqire e pret Prishtinën e Re, që nis po ashtu nga ora 15:00.
Ndërkohë, të dielën janë në program tri ndeshje të tjera, të gjitha me fillim nga ora 15:00.
Gjilani përballet me Dukagjinin në Gjilan, në një duel ku vendasit kërkojnë rikthimin te rezultatet pozitive.
Malisheva do të ketë përballë Ballkanin, ndërsa xhiro mbyllet me takimin ndërmjet Drenicës e Dritës në Skenderaj.
Me ndeshje të forta dhe pikë jetike në lojë, xhiroja e 29-të pritet të ndikojë dukshëm në renditjen tabelare, ndërsa sytë e tifozëve mbeten të përqendruar te supersfida Llapi–Prishtina, që premton spektakël dhe emocione deri në minutën e fundit.
