Izet Godeni i akuzuari për vrasjen e bashkëshortes së tij Sadije Godeni, është dënuar me 35 vite burgim sot në Gjykatën Themelore në Prishtinë. I akuzuari Godeni fillimisht ishte dënuar me 25 vite, por Gjykata e Apelit e kishte kthyer rastin ne rigjykim.
Nëntorin e vitit 2022 Kosova u trondit nga vrasja e arsimtares, Sadije Miftari Godeni.
Burri, i saj, Izet Godeni u akuzua se në ora 4 të mëngjesit para dy viteve në mënyrë mizore vrau Sadijen me sëpatë ndërkohë që e njëjta ishte në gjumë në shtëpinë e tyre në Prishtinë.
Për këtë akt fillimisht Gjykata Themelore e kishte dënuar në qershor të vitit 2023 me 25 vite burgim Godenin për shkak të veprës penale vrasje e rëndë, por Gjykata e Apelit kishte kthyer çështjen në rigjykim.
Andaj, të mërkurën u mbajt seanca në të cilën do shpallej aktgjykimi.
Por gjatë shpalljes së dënimit, i akuzuar, Izet Godeni nuk ishte në sallë.
Këtu, Godeni u dënua me 35 vjet burgim.
“Gjykata të akuzuarit Izet Godeni shqipton dënim me kohëzgjatje prej 35 viteve, të cilin dënim i akuzuari do ta mbajë pasi ky dënim të marrë formën e prerë”, tha gjykatësi Naser Foniqi.
Gjyqtari Foniqi po ashtu ka treguar edhe për rrethanat e privimit nga jeta të ndjerës nga ish bashkëshorti saj.
“Sepse më datë 25.11.2022 rreth orës 4 në shtëpinë e tij në Prishtinë në mënyrë mizore dhe dinake ka privuar nga jeta anëtarin e familjes së tij tani të ndjerën SadijeGodeni, në atë mënyrë që derisa e ndjera ka qenë duke fjetur në shtëpinë e saj, tani i akuzuari me sopatë si mjet i përshtatshëm për shkaktimin e lëndimeve trupore dhe rrezikimin e jetës tani të ndjerën e ka goditur disa herë në pjesën e kokës duke i shkaktuar lendimë të rrezikshme për jetën për shkak tëtë cilave tani e ndjera ka ndërruar jetë”, tha Foniqi.
Të gjitha seancat në këtë rast ishin mbajtur të mbyllura për publikun.
Kronikë e realizuar nga gazetarja, Gresa Bardhecaj.
