Kandidati i Partisë Demokratike të Kosovës për kryetar të komunës së Mitrovicës, Arian Tahiri ka ushtruar të drejtën e tij të votës dhe ka ftuar qytetarët që ta bëjnë të njëjtën gjë.
Tahiri theksoi rëndësinë e kësaj dite për qytetarët dhe për të ardhmen e qeverisjes lokale.
“Mesazhi im është se kjo është një ditë e rëndësishme për qytetarët e Mitrovicës dhe për qytetin, që sot të vendosim bashkërisht për qeverisjen tonë të ardhshme në katër vitet e ardhshme. I ftoj të gjithë qytetarët që të dalin dhe të shfrytëzojnë të drejtën e tyre të votës, përmes së cilës të tregojmë fuqinë tonë dhe të vendosim për qeverisjen lokale,” tha Tahiri.
Ai gjithashtu raportoi mbi lëvizje të dyshimta të veturave në qytet mbrëmë, shumica me targa 01.
Tahiri bëri me dije se organet kompetente janë informuar dhe po veprojnë në mënyrën më profesionale për të siguruar proces të rregullt votimi.
“Sot çdo gjë po shkon normalisht sipas rregullave të procesit të votimit, ndërsa mbrëmë kishte lëvizje të dyshimta të disa veturave. Besoj që institucionet kanë vepruar dhe po veprojnë në mënyrën më profesionale,” shtoi Tahiri.
