Federata e Boksit e Kosovës organizon për herë të 18-të Turneun Ndërkombëtar të Boksit për të Rinj U19 “Lah Nimani”, i cili do të mbahet në Pallatin e Rinisë dhe Sportit në Prishtinë.
Turneu tradicional, i vetmi i këtij niveli në Kosovë për grupmoshat e reja, organizohet në nderim të figurës së madhe të boksit kosovar dhe legjendës së trajningut, Lah Nimani. Turneu është pjesë e kalendarit zyrtar të Federatës Evropiane dhe Federatës Botërore të Boksit.
Në këtë edicion do të marrin pjesë përfaqësues nga shtatë shtete Bullgaria, Sllovakia, Kroacia, Mali i Zi, Maqedonia e Veriut, Shqipëria dhe Kosova, ku priten duele cilësore dhe shumë konkurruese, bazuar në paraqitjet dhe nivelin garues të paraqitur, pasi në ring do të ngjiten kampionë evropianë si dhe fitues të medaljeve botërore në kategoritë e të rinjve.
Ndërmjet këtij manifestimi sportiv, Federata e Boksit e Kosovës synon të vazhdojë traditën e këtij turneu prestigjioz dhe njëkohësisht të forcojë bashkëpunimin ndërkombëtar në sportin e boksit.
Gjysmëfinalet do të zhvillohen të shtunën më 16 maj, nga ora 16:00 derisa finalet më 17 maj, me fillim nga ora 12:00.
