Pas dështimit të Mudryk dhe Felix, Arsenali ka arritur të transferojë sulmuesin e Brighton, Leandro Trossard.
Sipas mediave angleze, fantazisti belg ka kryer me sukses testet mjekësore në London Colney paraditën e së premtes dhe të gjitha dokumentet mes klubeve janë nënshkruar.
Ky ofrim do t’i kushtojë Arsenalit rreth 21 milionë euro, shumë që mund të rritet në vijim për shkak të bonuseve duke arritur deri në 27 milionë.
Sulmuesi 27 vjeçar ka nënshkruar kontratë me Gunners, e cila do ta mbajë atë në Emirates deri në vitin 2026.
Trossard kishte probleme me drejtuesit e Brighton duke kërkuar largimin dhe këtë situatë e shfrytëzoi Arsenal, me Mikel Artetan që është admirues i lojës së tij.
Për belgun ishin të interesuara edhe disa skuadra të tjera, por ai preferonte kalimin tek Arsenal dhe në momentin që u kontaktua nga Arteta, kushtet personale nuk ishin problem për të.
Paga e tij tek Brighton deri më tani ka qenë 60 mijë funta angleze në javë, mirëpo ende nuk është bërë publike se sa do të fitojë tek Arsenali.
