Ministri i Punëve të Brendshme, Xhelal Svecla, ka publikuar edhe dy dokumente, që sipas tij dëshmojnë lidhjen e shtetit të Serbisë me grupin terrorist që sulmoi policinë në Bajnskë të Zvecanit.
Zyrtarisht ishte truprojë i Shefit të Agjencisë së Inteligjencës në Serbi, Aleksandar Vulin. Por Bojan Mijailoviq, mori edhe një detyrë të re. Ai ishte pjesë e grupit terrorist që sulmoi policinë e Kosovës, e ku mbeti i vrarë rreshteri Afrim Bunjaku.
E sipas ministrit të Punëve të Brendshme, Xhelal Sveçla, gjatë aksionit ndaj Policisë së Kosovës mbeti i vrarë edhe Bojan Mijailoviq, e që sipas tij dëshmon që shteti i Serbisë është këmbë e krye i përfshirë në këtë sulm terrorist me qëllim destablizimin e Republikës së Kosovës.
“Shteti i Serbisë është këmbë e krye i përfshirë në këtë sulm terrorist me qëllim destablizimin e Republikës së Kosovës. Për këtë gjë tashmë ekziston edhe lidhja formale e strukturore e përfshirjes së Aleksandar Vuçiq në sulmin e 24 shtatorit në Banjskë të Zveçanit: Milan Radojçiq, si nënkryetar i Listës serbe dhe truproja e Aleksandër Vulinit, shef i BIA-s. Të dy këta po ashtu të sanksionuar në listën e zezë të ShBA-ve. Të dy këta nga njerëzit më të afërt të presidentit të Serbisë”, tha ministri i Punëve të Brendshme, Xhelal Sveçla.
Gjatë së mërkurës ministri Sveçla publikoi edhe një dokument, i cili sipas tij dëshmon lidhjen zyrtare mes shtetit të Serbisë dhe grupit terrorist.
“Ky dokument është vërtetim që ushtria e Serbisë i ka dhënë grupit me rastin e dorëzimit të lansuesit të granatave, që më pas u zu nga Policia e Kosovës në aksionin e 24 shtatorit. Atë që e kemi deklaruar në vazhdimësi tash po e mbështesim edhe me fakte e dokumente të pakontestueshme se shteti i Serbisë mbështet këto grupe terroriste politikisht, financiarisht, logjistikisht”, u shpreh ministri Sveçla.
Sipas Sveçlës, këto fakte janë dëshmi tjetër se synimet e Serbisë ndaj Republikës së Kosovës nuk kanë ndryshuar aspak nga koha e regjimit të Millosheviqit.
Gjatë së martës Sveçla publikoi edhe një video që dëshmon përfshirjen e nënkryetarit të Listës Serbe, Milan Radojiçiq në grupin terrorist.
