Sociologu Genc Xërxa, tha se prindërit duhet t’ua kufizojnë kohën e përdorimit të telefonave të mençur fëmijëve, pasi sipas tij, ata mund të shohin përmbajtje që nuk përkojnë me moshën e tyre, raporton teve1.info
Në studion e “Ditarit” në Tëvë1, Xërxa tha se po ashtu prindërit duhet të kenë komunikim sa më të hapur dhe të fitojnë mirëbesimin e fëmijës, në mënyrë që ata të mund të kontrollohen në sjelljet dhe veprat e tyre.
Xërxa këtë diskutim e bëri pas arrestimit të një 16-vjeçari në Pejë, i cili ishte dyshuar se qenë duke e përgatitur një sulm terrorist të cilin sipas Policisë do ta realizonte në shkollën e tij.
“Është një lloj alarmi, ky lajm i keq tregon njëfarë alarmimi tek familja pastaj institucionet edukative-arsimore. E them sepse institucionet tona nuk duhet të jenë vetëm arsimore, por edhe edukative. Prindi duhet të vërej secilin ndryshim apo shfaqje të ndryshme të sjelljes tek fëmija i tyre dhe të merret me të. Prindi duhet ta ketë një komunikim të mirëfilltë, jo autoritativ por ta fitoj mirëbesimin dhe mirëkuptimin e fmëijës së vet, të diskutoj për shumë gjëra. Të jenë më të qasshëm, të angazhuar dhe të ketë orar të caktuar me telefonat e mençur sepse nëse kalojnë një kohë të gjatë me tel. do të bëhen të varur dhe informatat që i marrin ndoshta nuk do të përkojnë me moshën e tyre dhe do t’i përdorin në mënyrën e gabuar”, tha Xërxa.
Megjithatë, ai shtoi se me platformat e reja, qofshin edhe brenda telefonit, është me i qasshëm komunikimi me fëmijët.
Sipas tij, çdo problematikë e vogël mund të përcillet edhe nëse prindi nuk është prezent në shkollë.
Ndërkohë, se çka mund ta shtyjë një fëmijë ose të mitur të planifikoj sulm terrorist, Xërxa tha se ekzistojnë katër faktorë.
“Qka e ka shtyrë, cilët mund të jenë faktorët që ka ardhë deti te ky fenomen, sipas një instituti, kanë bërë një studim, ky fenomen është mjaft i shprehur në Amerikë dhe kanë ardhë në përfundim që 4 pikat kryesore që janë shtytës, janë: bullizimi, hakmarrja apo cilësimi jo-vleror i jetës. Këta sulmues potencial përballen me një shëndet të degraduar mendor, pastaj në aspektin tyre flet vetëm dhuna dhe e njohin vetëm atë gjuhë që e marrin vetëm prej rrethit apo edhe faktori i 4-të që është viktimë e dhunës së rrethit apo familjes. Ky është alarm për familjen ku secili prind duhet një angazhim shtesë. E dimë që jeta dinamike ekziston, shumë familje ballafaqohen me probleme ekonomike por duhet të gjejnë kohë sa më shumë për fëmijë dhe të jetë sa më shumë komunikimi në mes të nxënësve-prindit dhe institucionit arsimor. Është e detyrueshme një psikolog të jetë në qendrat edukative-arsimore”, u shpreh ai.
