Ardita Sinani, këshilltare e kryeministrit të Kosovës, Albin Kurti, tha se për 20 vitet e kaluara, Kosova e ndihmoi Luginën e Preshevës me mbi 400 mijë euro, derisa për dy vite të qeverisjes së Albin Kurtit, për qytetarët e këtij vendi janë ndarë afër 3 milionë Euro, raporton teve1.info
Në një intervistë në emisionin “Respublika” në Tëvë1, Sinani tha se nga fondi prej 2.8 milionë eurove, në Luginë kanë përfituar rreth 5 mijë qytetarë.
“Me rezultate konkrete për dy dekada diku në vlerë financiare është 480 mijë euro deri tani ndërsa në periudhën e tanishme, dy vitet e fundit ndihma financiare nga Kosova është direkt ku janë prekur mbi 5 mijë persona në vlerë prej 2.8 milionë Euro”, u shpreh ajo.
Ndërsa u pyet se si i komenton deklaratat e kryetarit të tanishëm të Preshevës, Shqiprim Arifi për keqpërdorim të fondit që Kosova e ka ndarë për Luginën, Sinani tha se nuk dëshiron të komentoj një gjë të tillë.
“Nuk i komentoj deklaratat e personit në fjalë sepse tërë kohën vetëm shpik, tërë kohën akuzon vetëm Qeverinë e Republikës së Kosovës, deri tash përgjatë kësaj kohe sa merret me politikë asnjë akuzë drejtuar Serbisë ose presidentit Vuçiq, dhe deklaratat e tilla nuk ja vlen të merren. Është mirë që ai të punoj, të kryej ato detyrat për të cilat për 7 vite e ka obligim të jetë në shërbim të qytetarëve të Komunës së Preshevës, gjendja atje është përkeqësuar dhe më tepër nuk kam fjalë të komentoj”, u shpreh Sinani.
