Në një sezon ku konkurrenca për golashënuesin më të mirë në kampionatin zviceran është e fortë, Xherdan Shaqiri, po dëshmon se cilësia nuk matet vetëm me numrin e golave, por me mënyrën se si arrihen ato. Mediat zvicerane e kanë vënë në pah një statistikë mbresëlënëse: ylli i Baselit është futbollisti më efikas ndër sulmuesit kryesorë të ligës.
Shaqiri ka regjistruar 21 goditje në portë gjatë këtij sezoni, nga të cilat plot 11 kanë përfunduar në rrjetë. Kjo përkthehet në një efikasitet prej mbi 52 për qind – një shifër që e vendos atë në krye të listës, larg çdo rivali tjetër në mesin e golashënuesve më të mirë.
Më i afërti me këtë ritëm është Christian Fassnacht, i cili ka realizuar 15 gola nga 29 goditje në portë. Megjithatë, edhe ai mbetet pas Shaqirit në raportin e saktësisë dhe efikasitetit para portës.
Në anën tjetër të statistikave qëndrojnë Matteo Di Giusto dhr Philippe Keny. Të dy kanë shënuar nga 12 gola këtë sezon, por për t’i arritur këto shifra u janë dashur nga 34 goditje në portë. Kjo do të thotë se ata realizojnë mesatarisht vetëm çdo të tretën tentativë, duke i bërë ndër më pak efikasit në mesin e sulmuesve elitë të kampionatit.
Sa i përket Shaqirit, forma e tij aktuale konfirmon një rikthim të fuqishëm në skenën kryesore. Me një kombinim të përvojës, teknikës dhe instinktit të lindur për gol, ai po dëshmon se vazhdon të jetë një nga lojtarët më vendimtarë në futbollin zviceran.
