Ish-presidenti i Kosovës, Fatmir Sejdiu ka thënë se bllokimi i zgjedhjes së kreut të Kuvendit të Kosovës paraqet një situatë të pazakonshme institucionale dhe politike.
Sejdiu ka shtuar se moskonstituimi i Kuvendit pas më shumë se 21 tentimeve e paralizon jetën parlamentare dhe e pengon formimin e qeverisë së re.
Sipas tij, kjo gjendje po reflekton mungesë të konsensusit politik dhe gatishmërisë për kompromis, duke dëmtuar drejtpërdrejt stabilitetin institucional dhe besimin e qytetarëve në procesin demokratik.
“Bllokimi i zgjedhjes së kreut të Kuvendit të Kosovës paraqet një situatë të pazakonshme institucionale dhe politike. Pas më shumë se 21 tentimeve të pasuksesshme, Kuvendi vazhdon të jetë jo-funksional, çka e paralizon jetën parlamentare dhe pengon formimin e qeverisë së re. Kjo gjendje po reflekton mungesë të konsensusit politik dhe gatishmërisë për kompromis, duke dëmtuar drejtpërdrejt stabilitetin institucional dhe besimin e qytetarëve në procesin demokratik”, ka shkruar ai në Facebook.
Sejdiu tutje është shprehur se pozita dhe opozita duhet të angazhohen në dialog serioz për të arritur një marrëveshje pasi për të bashkëpunimi ndërpartiak është çelës për zhbllokimin e situatës.
“Është nevojë urgjente që pozita dhe opozita të tregojnë maturi politike dhe fleksibilitet, duke u angazhuar në dialog serioz për të arritur një marrëveshje. Bashkëpunimi ndërpartiak është çelës për zhbllokimin e situatës dhe rikthimin e funksionimit normal të institucioneve”, ka shtuar Sejdiu.
Nëse kriza vazhdon, sipas Sejdiut rrezikohet jo vetëm puna e Kuvendit dhe formimi i Qeverisë, por edhe stabiliteti politik në vend dhe pasojat mund të përfshijnë zgjedhje të reja të parakohshme, krizë të besueshmërisë në institucione dhe dëmtim të imazhit ndërkombëtar të Kosovës.
“Shoqëria jonë ka nevojë për institucione funksionale dhe për angazhim të përbashkët politik që u përgjigjen pritjeve të qytetarëve për zhvillim, stabilitet dhe përparim demokratik. Vetëm përmes paqes publike, bashkëpunimit dhe mirëkuptimit mund të ndërtojmë një të ardhme të sigurt dhe të qëndrueshme për vendin tonë”, ka thënë në fund të postimit ai.
Ndryshe, për të 21-tën herë me radhë, Kuvendi i Kosovës nuk ka arritur të konstituohet as në seancën e së dielës duke vazhduar kështu ngërçin institucional që ka mbërthyer vendin pas zgjedhjeve të fundit.
Seanca për përpjekjen e radhës për konstituim të Kuvendit është caktuar për të martën më 27 maj, në orën 11:00.
