Për të 21-tën herë me radhë, Kuvendi i Kosovës nuk ka arritur të konstituohet, duke vazhduar kështu ngërçin institucional që ka mbërthyer vendin pas zgjedhjeve të fundit.
Seanca e thirrur për ditën e sotme përfundoi pa sukses, pasi nga opozita sërish nuk u pranua votimi i fshehtë për zgjedhjen e kryetarit të Kuvendit, i propozuar nga Lëvizja Vetëvendosje.
Kryesuesi i seancës, Avni Dehari sikur në rastet e mëparshme, konstatoi mungesën e kuorumit për formimin e komisionit ad-hoc për votim të fshehtë dhe e ndërpreu seancën.
Dehari, seancën për përpjekjen e radhës për konstituim të Kuvendit të Kosovës e caktoi për të martën më 27 maj, në orën 11:00.
Nga 90 deputetë sa ishin të pranishëm në sallë, 53 votuan pro, 1 ishte kundër, ndërsa abstenime nuk kishte.
Ndryshe, seanca e parë konstituive e legjislaturës së 9-të të Kuvendit të Kosovës është mbajtur më 15 prill.
