Sonte nga ora 20:00, në stadiumin “Fadil Vokrri” në Prishtinë, Prishtina e zhvillon ndeshjen kthyese në kuadër të kualifikimeve për Ligën e Evropës.
Bardhekaltrit u mposhtën thellë një javë më parë në Moldavi, duke pësuar humbje nga Sheriff Tiraspol prej 4:0.
Te fituesja e Kupës së Kosovës në futboll, e pranojnë se përmbysja e rezultatit do të jetë e vështirë, por që premtojnë ndeshje të madhe të enjten mbrëma ndaj ekipit moldav.
Trajneri Arsim Thaqi në konferencën para ndeshjes ka thënë se Prishtina ishte e pafat në Moldavi, dueli i kthimit është i vështirë dhe se skuadra po mendon më shumë për paraqitjen në Ligën e Konferencës, një javë më pas.
“Ne ishim edhe të pafat në disa situata ku Blend Baftiu kishte dy raste përballë portierit, pastaj Valmir Veliu e qëlloi shtyllën. Të gjitha këto gjëra, kuptohet kur ke përballë një ekip siç është Sheriffi, dështimet e kësaj natyre nuk falen, me vetë faktin që Sheriffi ato raste që i pati, i realizoi. Ekipet e mëdha normalisht që pak mundësi që i kanë, ato i realizojnë. Kjo është e kuptueshme. Megjithatë, ne e kemi llogaritur që si ekip që është e fortë, por ndoshta më tepër se që duhet e kemi vlerësuar dhe kjo ndikoi ndoshta negativisht te paraqitja e lojtarëve, me vetë faktin që ne kemi bërë disa gabime individuale”, është shprehur Thaqi.
Te Sheriffi kanë thënë se rezultati 4:0 është shumë i favorshëm. Por ai ka vlerësuar potencialin që ka ekipi i Prishtinës.
“Rezultati 4:0 duket komod, por jo për ne. Nuk ka kohë për t’u relaksuar. Rezultati nuk ka rëndësi për ne. Do ta marrim ndeshjen shumë seriozisht. Janë dy ndeshje krejtësisht të kundërta. Njërën e luajtëm në shtëpi, tani jemi mysafir. Mund të jetë skenar ndryshe. Ne luajmë për fitore në çdo ndeshje”, ka thënë trajneri i Sheriff Tiraspolit, Victor Mihailov.
Sheriffi është nënkampion dhe fitues në fuqi i Kupës së Moldavisë. Në edicionin 2021/2022 luajti në fazën grupore të Ligës së Kampionëve.
Ishte në grup me Real Madridin, Interin dhe Shakhtar Donetskun. Madje kishte fituar 2:1 ndaj Real Madridit në “Santiago Bernabeu” më 28 shtator të vitit 2021.
