Presidenti i Shqipërisë, Bajram Begaj, ka përcjellë një mesazh urimi për të gjithë shqiptarët me rastin e Vitit të Ri 2026, duke reflektuar mbi vitin që po mbyllet dhe duke shprehur shpresën për një vit të ri të mbushur me angazhim, bashkëpunim dhe përpjekje të përbashkëta.
Në mesazhin e tij për fundvitin, Begaj theksoi se ndërrimi i viteve është një moment reflektimi dhe projektimi të së ardhmes, duke e cilësuar Vitin e Ri si një vit shprese, veçanërisht për brezin e ri.
Ai nënvizoi rëndësinë e familjes dhe investimit te fëmijët dhe të rinjtë si themel i së ardhmes evropiane të Shqipërisë.
Presidenti vlerësoi arritjet e Shqipërisë gjatë vitit 2025, duke theksuar progresin në forcimin e shtetit të së drejtës, luftën kundër korrupsionit dhe krimit të organizuar, si dhe hapat e ndërmarrë drejt integrimit evropian.
Sipas tij, pavarësisht sfidave, vendi ka dëshmuar vullnet për të ecur përpara dhe për të forcuar pozitat ndërkombëtare.
Begaj apeloi për më shumë dialog, besim dhe bashkëpunim rreth interesave mbarëkombëtare, duke theksuar se viti 2026 duhet të jetë një vit i përpjekjes së përbashkët për ta kthyer standardin evropian në një realitet të prekshëm për çdo familje shqiptare.
Një urim të veçantë, presidenti i Shqipërisë e pati edhe për shqiptarët e Kosovës, Maqedonisë së Veriut, Malit të Zi, Luginës së Preshevës, arbëreshët dhe diasporën shqiptare, të cilët i cilësoi si pjesë të pandarë të kombit shqiptar dhe energji të rëndësishme për të ardhmen e përbashkët.
Në përmbyllje, Begaj uroi më shumë mirëkuptim, solidaritet dhe besim mes qytetarëve, duke e cilësuar Shqipërinë si një shtëpi të përbashkët që ndërtohet përmes përgjegjësisë dhe angazhimit të përditshëm.
