Xhevdet Pozhari, konsulent politik, ka komentuar zhvillimet e fundit politike në Kosovë dhe sinjalet që po vijnë nga lideri i Nismës Socialdemokrate, Fatmir Limaj.
I ftuar në emisionin “Këndi i debatit” në Tëvë1, Pozhari tha se deklaratat e Limajt tregojnë një ndryshim të qartë qëndrimi, duke lënë të kuptohet se ai është i gatshëm të bëhet pjesë e qeverisë.
“Vetë risi e kësaj jave është lëvizja e Fatmir Limajt dhe pohimi i tij se mund të bëhet pjesë e qeverisë. Në të kaluarën ai ka deklaruar të kundërtën – se nuk janë të gatshëm për këtë”, tha Pozhari.
Sipas tij, në prapavijë po ndodhin zhvillime të rëndësishme që mund të çojnë në krijimin e qeverisë së re.
“Unë mendoj që qeveria mund t’i ketë numrat për t’u formuar. Kemi pasur dyshime për pjesëmarrjen e Nismës, por duket se Limaj tashmë e ka konfirmuar këtë,” shtoi ai.
Pozhari tha se Limaj ka hequr dorë edhe nga kushti i mëhershëm për të marrë postin e kryetarit të Kuvendit si parakusht për të hyrë në qeveri.
“Limaj më herët thoshte: më jepni kryeparlamentarin dhe nuk hy në qeveri. Tani thotë se do të hyjë në qeveri – që nënkupton se ka hequr dorë nga ajo kërkesë,” përfundoi Pozhari.
