Një shtetas gjerman është ndaluar në pikën kufitare në Merdare, ku i janë gjetur dhe sekuestruar 24 revole të tipit Zoraki 9mm, raporton teev1.info
Sipas komunikatës së Policisë, pas bastisjes së veturës të tipit Mercedes të të dyshuarit, policia e ka vazhduar aksionin edhe në Pejë dhe Skenderaj, ku i ka arrestuar edhe dy të dyshuar tjerë si dhe ka konfiskuar një furgon, 3 telefona, 1 DVR dhe 650 euro para të gatshme.
“Me datë 02.10.2023, hetuesit e Njësisë për Hetimin e Krimit të Organizuar (Drejtoria për Hetimin e Krimit të Organizuar dhe Krimeve të Rënda) të Policisë së Kosovës, pas një pune hetimore dhe operative në teren në pikën e kalimin kufitar në Merdare, kanë ndaluar veturën e tipit Mercedes me tabela të huaja, të cilën e drejtonte i dyshuari H. H., (1975) me shtetësi Gjermane. Gjatë kontrollit të veturës së personit të dyshuar janë gjetur njëzetekatër (24) revole.
Lidhur me rastin pas arrestimit të personit të parë të dyshuar, në pikën kufitare Merdare, hetuesit policorë kanë ndërmarrë veprime të tjera hetimore me qëllim të zbardhjes së rastit, me ç’rast kanë kontrolluar tri lokacione: dy (2) lokacione në Pejë dhe një (1) lokacion në Skenderaj.
Në Pejë janë kontrolluar një pronë e të dyshuarit të parë H.H si dhe një pronë e të dyshuarit B.H., (1984) ndërsa në Skenderaj është kontrolluar prona e të dyshuarit H.Z., (1972)”, thuhet në komunikatë.
Në lidhje me rastin si dëshmi materiale janë sekuestruar:
24 revole të tipit Zoraki 9 mm, të modifikuara nga lloji i armës me plumba me gas, në armë me fishekë zjarri
1 veturë furgon – Mercedes me targa gjermane
650 euro para të gatshme
3 telefona
1 DVR
Me aktvendim të prokurorit kompetent pas intervistimit, tre të dyshuarve u është caktuar masa e ndalimit policor, prej 48 orë.
