Sipas disa pacientëve të intervistuar, mungesa e këtyre barërave po u shkakton probleme të mëdha pasi që terapia për ta është shumë e shtrenjtë, shkruan RTK.
Blerim Ademi ka një vit që trajtohet në Institutin e onkologjisë. Ai thotë se gjatë kësaj kohe, për sëmundjen e tij vazhdimisht ka mungesë të barnave, çmimi I të cilave është mjaft i lartë.
E vështirë për të ishte edhe mundësia e sigurimit të medikamenteve, madje në një rast, thotë se e mori terapinë e një pacienti që nuk mbijetoi.
Kurse onkologu Faton Sermaxhaj thotë për RTK se aktualisht furnizimi me barna të listës esenciale është rreth 85%. Sipas tij, prej tyre mungojnë kryesisht citostatikët e zakonshëm.
“Vazhdimisht kem problem me barnat të cilat kanë një kosto më të lartë për vet faktin se kanë një çmim më të lartë dhe në momentin që janë futur këto barna në listën esenciale mu për shkak të kostos së tyre të lartë, janë futur vetëm për një numër të caktuar të pacientëve sepse nuk ka pasur mundësi që të përfshihen të gjithë pacientët”, tha ai.
Ndërsa, drejtoria e Shërbimit Spitalor Klinik Universitar ka deklaruar se është duke punuar për të hartuar protokollet unike në bazë të të cilave do të bëhet trajtimi i pacientëve të Institutit Onkologjik.
Po ashtu, në përgjigjen e tyre me shkrim thuhet se përshkrimi i terapisë do të bëhet vetëm përmes konsiliumeve mjekësore.
Numri i pacientëve që marrin shërbime shëndetësore në Institutin Onkologjik bë ditë arrin deri në 200, shifër kjo që nga mjekët konsiderohet e lartë, krahasuar me numrin e përgjithshëm të popullsisë.
