Kryeministri Edi Rama iu përgjigj pyetjeve të deputetëve të opozitës në seancën plenare, lidhur me mungesën e tij në Davos, ku u nënshkrua Karta për Bordin e Paqes të iniciuar nga presidenti amerikan Donald Trump.
Rama sqaroi se ishte i detyruar të bënte një zgjedhje mes pjesëmarrjes në Davos dhe mikpritjes së vajzës së Trump, Ivanka, e cila ndodhej në Vlorë.
Rama theksoi se vendimi i tij për të pritur Ivanka Trump ishte i koordinuar me presidentin amerikan dhe se kjo nuk cenon angazhimin e Shqipërisë në këtë forum ndërkombëtar.
“Meqë po përsëritet e njëjta pyetje dhe mos shqetësoheni pse unë nuk jam atje se mezi prisnit, duhet të bëja një zgjedhje mes t’i përgjigjesha ftesës së babait apo të mikprisja vajzën këtu në Shqipëri. Edhe zgjodha vajzën. Natyrisht që vajzën e zgjodha me lejen e babait,” tha Rama.
Duke iu drejtuar opozitës, Rama tha se, “Duhet të bëja një zgjedhje, t’i përgjigjesha ftesës së babait apo të mikprisja vajzën në Shqipëri, dhe zgjodha vajzën. Dhe natyrisht, që vajzën e zgjodha me lejen e babait. E dyta, duke qenë se Mediu është ura që lidh Amerikën me rrugën e shpresës, prisja nga Mediu që të hidhte poshtë pretendimin e Britanisë dhe të mbante anën e Amerikës. Por s’ka problem, ne nuk shohim arsye për divergjenca të tilla, sepse analizat i kanë bërë ata që na kanë ftuar dhe ne s’na ka ardhur koha të analizojmë ata që na ftojnë.”
Kuvendi u mblodh sot për të ratifikuar aderimin e Shqipërisë në Bordin e Paqes për Gazën, një nismë që pritet të zgjerohet edhe për konflikte të tjera globale./rtsh.al/
