Ministria e Drejtësisë ka për qëllim krijimin e një linje emergjente telefonike kombëtare për vitkimat e dhunës në familje, dhunës ndaj grave dhe dhunës në baza gjinore. Por ky mekanizëm, po shihet me skepticizëm shkaku se Ministria nuk ka kompetenca për zgjidhje të rasteve të dhunës.
Dhuna në familje, dhuna ndaj grave dhe dhuna në baza gjinore, po synohet të ketë edhe një adresë shtesë për raportim.
Enkas për këto kategori të dhunës, Ministria e Drejtësisë po synon krijimin e një linje emergjente telefonike kombëtare.
Kjo linjë planifikohet të punojë 24h pa pagesë, fondet dhe procedurat për funksionim dhe mirëmbajtje të së cilës, do të sigurohen nga MD.
Shërbimi i linjës synohet të ofrohet nga organizatat e specializuara dhe të licencuara në fushën e shërbimeve dhe mbrojtjes sociale për viktimat e dhunës, duke ofruar ndihmë të drejtpërdrejtë, referim të shpejtë te shërbimet përkatëse, siguron që viktimat të kenë qasje në informacion dhe mbështetjen e nevojshme për mbrojtjen dhe fuqizimin e tyre.
Por ka skepticizëm se sa i nevojshëm është një mekanizëm i tillë.
“Konsideroj se dhuna në familje dhe dhuna në baza gjinore, është e luftueshme edhe me mekanizmat aktual, mekanizmat që ekzistojnë edhe për krime tjera, siç është raporti në Polici. Gjithsesi, mendoj se një linjë shtesë ose një mekanizëm tjetër shtesë nuk do të ishte kurgjo e keqe në këtë drejtim.Prapë se prapë zgjidhja është raportimi i rasteve të dhunës në familje në Polici. Dhe një institucion shtesë mund ta ketë rolin vetëm të ndërmjetësuesit ose të adresuesit të problemeve, por ai institucion nuk mund t’i zgjidhë problem dhe nuk mund t’i zgjidhë rastet”, thotë avokati Arbër Jashari.
Bazuar në këtë, kjo iniciativë po konsiderohet si e pakuptimtë.
“Raportimi përmes linjës telefonike të rasteve të dhunës në familje në Ministrinë e Drejtësisë, është vërtetë e pakuptimtë, sepse e njëjta ministri, i njëjti institucion, nuk ka asnjë kompetencë ligjore për të marrë masa ndëshkuese ndaj rasteve të dhunës në familje, raste të cilat raportohen. E njëjta është e detyruar, jo vetëm Ministria, por sipas ligjit edhe qytetari i rëndomtë, e kanë për obligim ligjor që ta raportojnë dhunën në familje në Policinë e Kosovës, shprehet Anton Nrecaj – INSTIUTI CLARD
Kjo linjë po synohet të bëhet përmes një Udhëzimi Administrativ, i cili aktualisht është në konsultime publike.
