Deputetja e Lëvizjes Vetëvendosje, Fitore Pacolli, në emisionin “Këndi i Debatit” në Tëvë1, ka folur për deklaratën e ministres së drejtësisë në largim, Albulena Haxhiu, e cila tha se ish-opozita është treguar në harmoni me Listën Serbe sot pas dështimit të VV-së për ta formuar qeverinë Konjufca 1.
Pacolli u pyet drejtpërdrejt nëse ndonjëherë edhe VV-ja ka pasur votim të njëjtë me Listën Serbe. Ajo e mohoi kategorikisht një gjë të tillë dhe akuzoi partitë e ish-opozitës se pikërisht ato kanë bashkëpunuar në vendimet më të dëmshme për vendin.
“Vallahi nuk ka pasur asnjë rast që LVV-ja të ketë votuar njëjtë me Listën Serbe. Lista Serbe bashkë me partitë e tjera ka votuar Gjykatën Speciale. Lista Serbe bashkë me partitë e tjera ka votuar për demarkacionin. Pra, vendimet më të dëmshme për shtetin e Kosovës i ka votuar PDK, LDK, AAK, Nisma edhe Lista Serbe”, tha Pacolli.
VV e akuzon opozitën për koordinim me Listën Serbe, ndërsa opozita thotë se VV ka humbur mbështetjen politike dhe nuk po arrin ta formojë qeverinë.
Pacolli theksoi se përgjegjësia për situatën aktuale nuk bie te deputetët e VV-së, por te ata që, siç tha ajo, “nuk po e kryejnë detyrën që ua ka dhënë qytetari”.
