Zëvendëskryeministri i parë në detyrë, Besnik Bislimi, ka deklaruar se Kosova është e përgatitur për të marrë statusin e vendit kandidat për Bashkimin Evropian dhe për të avancuar më tej në rrugën drejt integrimit evropian.
Në një darkë joformale ministrore për Ballkanin Perëndimor dhe BE-në, Bislimi ka theksuar rëndësinë e diskutimeve mbi çështjet rajonale, sigurinë dhe procesin e zgjerimit të BE-së.
“Kosova meriton marrjen e statusit të vendit kandidat dhe avancimin në rrugën drejt BE-së. Progresi i Kosovës në katër vitet e fundit ka dëshmuar se jemi më të përgatitur se kurrë për një hap të tillë,” ka thënë ai.
Bislimi gjithashtu ka nënvizuar se avancimi i Kosovës drejt BE-së është një përgjigje ndaj kërcënimeve të sigurisë dhe rreziqeve që vijnë nga ndërhyrjet e jashtme dhe sulmet e vazhdueshme të fqinjit verior ndaj integritetit territorial të vendit.
Ai ka falënderuar Përfaqësuesen e Lartë të BE-së për Punë të Jashtme dhe Politikë të Sigurisë, Kaja Kallas, për ftesën, si dhe Komisioneren e Bashkimit Evropian për Zgjerim, Marta Kos, për mundësinë për të diskutuar çështje me interes të përbashkët për rajonin dhe Evropën.
