Trajneri Orges Shehi dhe Ballkani kanë ndarë rrugët të mërkurën në mbrëmje, ka njoftuar tri herë kampioni i Kosovës.
Ballkani ka shkruar se Shehi kishte njoftuar zyrtarët e klubit menjëherë pas humbjes 2:0 nga Drenica se do të largohet në muajin janar.
Mirëpo, kryesia e klubit ka marrë vendim që largimi i tij të ndodhë tani, duke vlerësuar situatën dhe nevojën për stabilitet të menjëhershëm.
Ekipin do ta udhëheqë përkohësisht trajneri i skuadrës U21 të Ballkanit, Edon Gashi.
“FC Ballkani njofton se trajneri Orges Shehi nuk është më në krye të skuadrës sonë. Klubi falënderon Orges Shehin për punën dhe kohën e kaluar te FC Ballkani, duke i uruar suksese në vazhdim të karrierës”, ka shkruar ndër të tjera Ballkani.
Shehi largohet nga Ballkani ndonëse ka vetëm tri pikë më pak se Prishtina lidere me 26 pikë në Superligën e Kosovës.
Shehi pati marrë drejtimin e Ballkanit në muajin dhjetor të vitit të shkuar.
