Analisti politik, Albinot Maloku, në emisionin “Këndi i Debatit” në Tëvë1, ka vlerësuar se një pjesë e përgjegjësisë për situatën politike pas zgjedhjeve të 9 shkurtit bie edhe mbi presidenten e vendit, Vjosa Osmani. Sipas tij, presidentja nuk ka vepruar me vendosmëri në momentet kyçe dhe ka lejuar zvarritjen e krizës politike.
“Në momente të caktuara, siç pritej të ndodhte, presidentja duhej të ishte në krye të detyrës. Gabimi që ajo bëri ishte momenti kur ‘luajti bixhoz’ me emërimin e mandatarit të dytë. U panë nënshkrimet, numrat dhe faktet, dhe ajo në një formë i ndihmoi shtyrjes në kohë të kësaj krize politike dhe këtij ngërçi”, tha Maloku.
Ai shtoi se presidentja është dashur të japë orientim të qartë dhe të shpejtë për ta shmangur thellimin e situatës politike.
“Kjo do të duhej të ishte në të mirën e qytetarëve, të vendit dhe të proceseve nëpër të cilat po kalon Republika e Kosovës. Mungesa e vendosmërisë së saj ka qenë e dëmshme për gjithë fazën që po kalon vendi”, u shpreh ai.
Deklarata e Malokut nxiti debat në studio, veçanërisht nga deputetja e VV-së, Fitore Pacolli, e cila mohoi kategorikisht se Osmani ka vepruar jashtë kompetencave të saj.
“Nuk e di ku u bazove kur the se ka ‘luajtur bixhoz’. Askush nuk e përcakton — asnjë ligj apo Kushtetuta e Republikës së Kosovës — që presidentja duhet të mbledhë nënshkrime apo numra të partive. Prandaj, kjo akuzë nuk qëndron”, tha Pacolli.
Në përgjigjen e tij, Maloku insistoi se mënyra si është menaxhuar procesi ka zgjatur krizën.
“Kur them ‘bixhoz’, e kam fjalën për faktin që Kosova u fut në një fazë të re pas rënies së mandatarit të parë. Në momentin e caktuar, presidentja duhej të ishte e vendosur maksimalisht për të mos e shtyrë situatën edhe më tej”, tha ai.
Sipas Malokut, dështimi i mandatarit të parë duhet të kishte çuar menjëherë drejt rrugës për zgjedhje.
