Kylian Mbappe u kthye të enjten mbrëma nga lëndimi që e mbajti jashtë fushës në dy ndeshjet e kaluara. Në fitoren 2:0 të Real Madridit ndaj Oviedos, francezi luajti prej minutës së 69-të.
Ylli i futbollit ka thënë se nuk ka startuar për shkak se trajneri Alvaro Arbeloa nuk e vlerëson zgjedhje të parë për sulmin.
Mbappe foli për mediat spanjolle pas ndeshjes, pasi ai u vërshëllye zhurmshëm nga shikuesit kur hyri në fushë.
“Ishte mëkat për mua që nuk luajta në ‘El Clasico’. Nuk mund të ndryshojmë mendimin e njerëzve. Kam pasur momente në karrierë kur jam fishkëllyer”, ka thënë Mbappe.
Tifozët e Madridit u revoltuan në Mbappen kur ai udhëtoi për në Itali gjatë rikuperimit nga lëndimi.
“Jam 100 për qind në rregull. Nuk kam luajtur për shkak se për trajnerin isha sulmuesi i katërt në skuadër pas Mastantuonos, Vinit dhe Gonzalos. Isha i gatshëm për të startuar. Është vendim i tij dhe vendimi gjithnjë duhet të respektohet. Nuk jam i zemëruar”.
Mosmarrëveshjet mes Kylian Mbappes dhe trajnerit të Real Madridit, Alvaro Arbeloa në një mënyrë janë konfirmuar edhe nga ky i fundit. Por Arbeloa ka mohuar t’i ketë thënë francezit se është vetëm zgjedhja e katërt për sulmin para ndeshjes të së enjtes ndaj Oviedos.
“Nuk i kam katër sulmues dhe nuk i kam asgjë të tillë Mbappes. Mw ka keqkuptuar ”, ka thënë Arbeloa.
Mosmarrëveshjet mes tyre janë vetëm zhvillimi i radhës kaotik te Real Madridi. Një javë më parë Valverde dhe Tchouameni u rrahën mes tyre, Më pas erdhi humbja 2:0 në klasiken ndaj Barcelonës që i mundësoi titullin rivales së madhe.
Të martën presidenti Florentino Perez shpalli zgjedhjet e reja të klubit, duke theksuar se ishte “viktimë” e një kampanje të organizuar për largimin e tij.
