Kombëtarja U19 e Kosovës në hendboll e ka përfunduar të premten paraqitjen në Kampionatin Botëror “Egjipti 2025”.
Në ndeshjen për vendin e 23-të, Kombëtares sonë i mungoi fati. Dardanët e ri u mposhtën në penallti nga Bahreini (33:31 rezultati i përgjithshëm).
Në mesin e pjesës së parë Kombëtarja jonë mbeti pa kapitenin Olsi Mulaj që u përjashtua me të kuq për një moment pafat. Mulaj tashmë i kishte pesë gola.
Kjo bëri që loja të pësoi rënie dhe Bahreini u shkëput në katër gola në pjesën e parë.
Në pjesën e dytë hendbollistët e Kosovës, u afruan gradualisht dhe në sekondën e fundit me golin e Suad Pajaziti nga penalltia barazuan në 29:29.
Por në gjuajtjen e penalltive fati ishte me Bahreinin (4:2).
Drijon Istefi u shpall më i miri i ndeshjes. Ai i realizoi gjashtë gola.
Suad Pajaziti i kishte tetë e Amar Muqolli shtatë.
Kombëtarja e Kosovës e përfundoi Botërorin në vendin e 24-të nga 32 ekipe kombëtare pjesëmarrëse.
