Komuna e Prishtinës ka marrë vendim që nga 1 tetori një numër kategorish të qytetarëve të lirohen nga pagesa e biletës në trafikun urban.
Sipas vendimit të nënshkruar nga kryetari Përparim Rama, përfitues të kësaj mase do të jenë: personeli shëndetësor, administrativ dhe teknik i institucioneve shëndetësore, stafi mësimor dhe teknik i institucioneve arsimore, përfshirë edhe ato parashkollore, punonjësit e administratës së Kryeqytetit në të gjitha nivelet dhe institucionet vartëse, të gjithë nxënësit e shkollave të mesme të Prishtinës, si dhe studentët e universiteteve të Kryeqytetit.
Zbatimi i vendimit thuhet se hyn në fuqi menjëherë, ndërsa zbatimi i tij do të bëhet nga ndërmarrja publike “Trafiku Urban” nga 1 tetori.
“Transformimi i Transportit Urban vazhdon! Nga 1 tetori, me këtë vendim, transporti urban do të jetë falas për: Stafin shëndetësor, si dhe stafin administrativ, teknik dhe mbështetës të të gjitha institucioneve shëndetësore të Kryeqytetit; Stafin mësimor, si dhe stafin administrativ, teknik dhe mbështetës të të gjitha institucioneve arsimore të Kryeqytetit, përfshirë edhe institucionet parashkollore; Të gjithë punonjësit e administratës së Kryeqytetit, në të gjitha nivelet, duke përfshirë edhe institucionet vartëse të tij; Të gjithë nxënësit e shkollave të mesme në Kryeqytet; Të gjithë studentët e Kryeqytetit. Qytetarët janë prioriteti ynë, për një Prishtinë më të gjelbër dhe me më pak vetura!”, ka shkruar Rama në Facebook.
