Policia e Kosovës e ka arrestuar një person në kërkim nga Interpoli, me dyshimin për përfshirje në disa vepra penale, raporton teve1.info
Sipas komunikatës së Policisë, i dyshuari është arrestuar nga ILECU-FAST Kosova, në vazhdën e bashkëpunimit policor ndërkombëtar me shtetet partnere.
“Njësia FAST-Kosova, në koordinim me zyrtarë të njësitit të antidrogës në rajonin e Pejës, kanë arritur të lokalizojnë vendndodhjen e më pas edhe ta arrestojnë personin e dyshuar të kërkuar me urdhër arrest ndërkombëtar.
Personi i kërkuar, i cili kërkohej nga INTERPOL-i në llogari të organeve shtetërore gjermane, dyshohet se është i përfshirë në disa vepra penale”, thuhet në komunikatë.
Sipas njoftimit, lidhur me rastin do të ndërmerren masat sipas procedurave në raste të tilla.
“Policia e Kosovës mbetet e përkushtuar në parandalimin dhe luftimin e të gjitha dukurive të kundërligjshme në vend përfshirë edhe forcimin e bashkëpunimit policor në rrafshin ndërkombëtar”, thuhet në njoftimin policor.
