Me Dritën kampione, të shpallur të shtunën e kaluar, Xhiroja e 34-të e Superligës në futboll, fokusin kryesor do ta ketë të skuadrat që e synojnë Evropën e në veçanti te ato që do të luajnë për t’i shpëtuar rënies nga Liga dhe për t’i ikur barazhit.
Xhiroja e radhës, luhet të dielën, me të gjitha ndeshjet që luhen në të njëjtën ditë dhe të njëjtin orar, nga ora 16:00.
Në tri xhirot e fundit, janë të përfshira shtatë skuadra në garën e mbijetesës, duke nisur nga Prishtina e vendit të katërt, që ka 45 pikë.
Bardhekaltrit janë nikoqir të Ferizajt, skuadrës së parafundit në tabelë.
Të dyja skuadrat, janë në serinë negative prej shtatë ndeshjeve pa fitore rresht. Si Prishtina, ashtu edhe Ferizaj, fitoren e fundit e kanë realizuar më 21 mars, gati dy muaj më parë.
“Ujqit”, humbja i dërgon në një kategori më poshtë, derisa Prishtina me disfatë, mund të zhytet edhe më shumë në garën e barazhit, të cilës i ikë vetëm 5 pikë.
Punët më mirë s’i kanë as Gjilani e Llapi, që ndeshen në këtë xhiro. Gjilani është i pesti me 45 pikë, derisa Llapi i ka 40, në vendin e tetë.
Duel me synime të kundërta është ai i Malishevës e Drenicës. Malisheva duket se e ka siguruar Evropën, por mund ta zë vendin e dytë, ndërsa Drenica me një fitore, mund të marrë frymë lirshëm në garën për mbetje në ligë.
Kampionia Drita udhëton në Klinë për ndeshjen me Dukagjinin, skuadër kjo e rrezikuar, ndërsa Ballkani i dyti në tabelë, e pret skuadrën e fundit, Prishtinën e Re, e cila ka vetëm gjasa teorike për të shpëtuar.
