Më 1 tetor shënohet Dita Ndërkombëtare e Personave të Moshuar, e cila këtë vit vjen me moton “Epoka e jetëgjatësisë: Përshtatja e sistemeve për një jetë më të gjatë dhe më të mirë”.
Kjo ditë synon të rikujtojë rëndësinë e respektit, kujdesit dhe mbështetjes për personat e moshuar, duke promovuar shëndetin, pavarësinë dhe një cilësi më të mirë të jetës në moshë të shtyrë.
Instituti Kombëtar i Shëndetësisë Publike të Kosovës, në bashkëpunim me Ministrinë e Shëndetësisë, do ta shënojë këtë ditë përmes një takimi me përfaqësues të institucioneve, organizatave që merren me çështjet e personave të moshuar, si dhe përfaqësues të mediave.
Sipas njoftimit, aktivitetet edukative do të zhvillohen gjatë gjithë muajit tetor, me qëllim të rritjes së ndërgjegjësimit për rëndësinë e moshimit të shëndetshëm.
Organizatorët synojnë që përmes këtyre aktiviteteve të promovojnë kujdesin shëndetësor, mirëqenien dhe përfshirjen e personave të moshuar në shoqëri./teve1.info/
