“Final4” i Kupës së Republikës së Kosovës në hendboll do të organizohet në palestrën “Bill Clinton” në Ferizaj.
Organizator i turneut final të Kupës është KH Kastrioti, ndërsa vendimin e mori Bordi i Federatës së Hendbollit të Kosovës. Ishin tri aplikime për organizim të turneut përfundimtar të Kupës, në të cilin zhvillohen gjysmëfinalet dhe finalet.
Të mërkurën është firmosur edhe kontrata, përmes të cilës caktohen detyrat dhe përgjegjësitë e organizatorit të turneut final të Kupës.
Kontratën e kanë nënshkruar presidenti i FHK-së, Edin Kolgeci dhe anëtari i Bordit të KH Kastrioti, Agon Zhinipotoku.
Gjysmëfinalet do të zhvillohen më 25 prill, ndërsa finalet më 26 prill.
Te meshkujt gjysmëfinalet janë: Rahoveci – Kastrioti dhe Besa Famgas – Prishtina.
Te femrat ndeshjet gjysmëfinale janë: Istogu – Shqiponja, Ferizaj – Samadrexha.
