Skuadra nga Arabia Saudite, Neom, përfundimisht ka hequr dorë nga transferimi i Granit Xhakës, kanë njoftuar mediumet gjermane, të enjten.
Bëhet e ditur se ekipi saudit nuk ka dashur të ofrojë më shumë se 8 milionë euro për kartonin e Xhakës, ofertë kjo që është refuzuar nga Bayer Leverkuseni.
Edhe pse Neom kishte marrëveshje personale me Xhakën, të cilit i kishte ofruar pagë vjetore prej 10 milionë eurosh, është dorëzuar në garën për transferimin e tij për shkak të kërkesës së Leverkusenit.
Klubi gjerman po kërkon të paktën 15 milionë euro për mesfushorin 32-vjeçar, i cili ka kontratë me Leverkusenin deri në vitin 2028.
Megjithatë, thuhet se në garë për shërbimet e Xhakës, kanë mbetur Sunderlandi dhe Fenerbahçe, ekipe që kanë kontaktuar me përfaqësuesit e futbollistit shqiptar.
Po ashtu, situatën e Xhakës tek Leverkuseni po e monitorojnë edhe Milani, Interi e Juventusi.
