Dy grupe kryesore gjermane për të drejtat e njeriut e kanë akuzuar Izraelin për “kryerje gjenocidi kundër palestinezëve në Rripin e Gazës”.
“Gjithashtu arrijmë në përfundimin se Izraeli ka kryer dhe vazhdon të kryejë gjenocid kundër palestinezëve në Rripin e Gazës përmes luftës së tij”, tha Julia Durchow, sekretare e përgjithshme e degës gjermane të Amnesty International, në një konferencë për shtyp në Berlin, transmeton Anadolu.
Vrasjet masive të Izraelit në enklavë dëshmojnë “qëllimet e tij gjenocidale”, shtoi ajo.
Ndërkohë, kancelari gjerman, Friedrich Merz i ka bërë thirrje Izraelit që të përmirësojë urgjentisht situatën humanitare në Rripin e Gazës, duke thënë se hapat fillestarë janë të mirëseardhur, por të pamjaftueshëm.
Ai theksoi se është i nevojshëm përparim i mëtejshëm për të parandaluar një përkeqësim të krizës dhe paralajmëroi kundër çdo lëvizjeje të mëtejshme drejt aneksimit të Bregut Perëndimor të pushtuar.
Njohja e një shteti palestinez duhet të shihet si një nga hapat e fundit brenda kornizës së një zgjidhjeje të negociuar me dy shtete, tha Merz./teve1/
