Policia e Kosovës ka arrestuar një person të dyshuar në Prishtinë për veprën penale të shpërndarjes së materialeve me përmbajtje të shfrytëzimit dhe keqpërdorimit seksual të fëmijëve.
Sipas njoftimit zyrtar, rasti është raportuar në fillim të muajit prill në stacionin policor në Drenasi.
“Menjëherë janë angazhuar hetuesit e Njësitit të Hetimeve të Përgjithshme (NjHP), përkatësisht ekipi për hetimin e krimeve kibernetike, të cilët kanë ndërmarrë veprime hetimore që kanë rezultuar me arrestimin e personit të dyshuar (i mitur)”, thuhet në njoftim.
Me vendim të prokurorit të shtetit, i dyshuari është dërguar në qendrën e mbajtjes për 24 orë, ndërsa hetimet për rastin po vazhdojnë.
