Përmes një postimi në llogarinë e saj në Facebook, Nagavci ka shkruar se plagjiatura konsiderohet si forma më e rëndë e shkeljes së etikës akademike dhe se trajtimi i denoncimeve për plagjiaturë nga organet përkatëse të institucioneve akademike është sfidues.
“Mirëpres shqyrtimin e rasteve nga Këshilli i Etikës të UP, por konsideroj se masat e shqiptuara të pezullimit nga mentorimi i punimeve të diplomës nuk janë adekuate, sepse nuk shpërfaqin gjykimin shoqëror në raport me praktikat e tilla brenda komunitetit akademik dhe nuk i dekurajojnë ato.
Andaj pres nga organet përgjegjëse të Universitetit që t’i rishikojnë masat e shqiptuara nga Këshilli i Etikës, duke siguruar respektimin e standardeve të ndershmërisë akademike brenda institucionit”, ka shkruar ndër të tjera Nagavci.
Ajo ka shtuar se me Projektligjin e ri për arsimin e lartë, i cili siq ka shkruar, së shpejti do të jetë në diskutim publik, janë paraparë masa të veçanta për parandalimin e të gjitha formave të cenimit të integritetit akademik, përmes formimit të Komitetit Etik në nivelin qendror, si dhe obligimit që të gjitha institucionet e arsimit të lartë të kenë këshilla të etikës.
“Gjendjen në Universitetin e Prishtinës nuk e kemi të mirë dhe kjo është evidentuar së fundmi edhe në ranglistën prestigjioze “Ëebometrics”, sipas të cilës vazhdon rënia e UP-së në rangim. Kjo është e papranueshme dhe s’mund të vazhdojë. Urgjentisht duhet të bëjmë ndryshime që të përmirësojmë këtë gjendje”, ka shkruar Nagavci.
Ministrja Nagavci ka thënë se stafi akademik duhet të jenë persona me integritet e kredibilitet të lartë profesional e personal. Andaj sipas saj, angazhimi i Qeverisë për të përmirësuar këtë gjendje do të jetë këmbëngulës e pa hezitim.
Reagimi i Ministres Nagavci vjen pas shqiptimit të disa masave disiplinore nga ana e Këshillit të Etikë së UP-së lidhur me dyshimet për plagjiaturë ndaj disa profesorëve të Universitetit të Prishtinës.
