Dogana e Kosovës ka bërë të ditur se ka asgjësuar 4 mijë preparate të falsifikuara për larje dhe pastrim, të cilat përdornin pa autorizim markën tregtare “Ariel”.
Sipas njoftimit, këto produkte janë sekuestruar nga zyrtarët doganorë pas dyshimeve për shkelje të të drejtave të pronësisë intelektuale.
Pas verifikimeve të kryera në bashkëpunim me institucionet kompetente dhe bartësit e të drejtave, si dhe pas vendimit të gjykatës, është vendosur që mallrat të asgjësohen.
Nga Dogana theksohet se produktet e falsifikuara, sidomos ato për përdorim të përditshëm si preparatet për pastrim, mund të paraqesin rrezik për shëndetin e qytetarëve, pasi nuk i nënshtrohen standardeve dhe kontrolleve të cilësisë.
Asgjësimi i tyre është realizuar në përputhje me legjislacionin në fuqi dhe nën mbikëqyrje të plotë doganore, me qëllim parandalimin e qarkullimit të këtyre produkteve në treg.
