Sekretari i Përgjithshëm i NATO-s, Mark Rutte, u tha ligjvënësve të BE-së se ideja që Evropa ose BE-ja mund të mbrohet pa Shtetet e Bashkuara është joreale, duke theksuar se ata që e besojnë këtë duhet të “vazhdojnë të ëndërrojnë”.
Rutte paralajmëroi se shpenzimet e mbrojtjes në Evropë do të duhet të rriten masivisht, deri në 10%, përfshirë investime në kapacitete bërthamore dhe shpenzime prej “miliarda e miliarda euro”.
Ai theksoi se Evropa ka nevojë për SHBA-në dhe, në mënyrë të ngjashme, SHBA-ja ka nevojë për NATO-n.
Duke folur për Ukrainën, Rutte tha se aftësia e vendit për të përgjuar dronët rusë ka rënë, për shkak të mungesës së pajisjeve.
Ai u bëri thirrje ligjvënësve të BE-së të ndihmojnë për të bindur disa udhëheqës evropianë, të cilët disponojnë rezerva të mëdha përgjuesish, që t’i dërgojnë ato Ukrainës, megjithëse refuzoi t’i përmendë me emër në një seancë të hapur.
“Ky është ndryshimi midis jetës dhe vdekjes, ditë për ditë, dhe mënyrës se si e mbrojmë infrastrukturën thelbësore të energjisë”, tha ai, citon Guardian.
Rutte iu referua gjithashtu komenteve të fundit të presidentit ukrainas Volodymyr Zelenskyy, sipas të cilave garancitë e sigurisë nga SHBA-të janë “pranë arritjes së një marrëveshjeje”.
Ai pranoi se ekziston një çështje e madhe dhe “shumë e ndjeshme” e pazgjidhur lidhur me territorin dhe Rusinë, duke theksuar se vetëm Ukraina mund të vendosë se çfarë kompromisi, nëse ka, mund të pranojë.
Sa i përket anëtarësimit të Ukrainës në NATO, Rutte tha se Kievi e dëshiron këtë, por disa shtete anëtare mbeten kundër, ndaj “politikisht, kjo praktikisht nuk është në plan”, të paktën për momentin.
Ai mohoi kategorikisht se SHBA-të kanë tentuar të shfrytëzojnë premtimet për garanci sigurie ndaj Ukrainës në bisedimet me NATO-n për Grenlandën.
Ai theksoi gjithashtu rëndësinë e kontributit të aleatëve në Afganistan, në kundërshtim me komentet e bëra javën e kaluar nga presidenti amerikan, Donald Trump./teve1
