Pas dy fitoreve rresht, KB Trepça po synon edhe triumfin e tretë në kuadër të fazës grupore në FIBA Europe Cup.
Kampionia e Kosovës, mposhti Splitin në udhëtim dhe Opavan në Mitrovicë në dy ndeshjet e fundit, ndërsa tani do të përballet në udhëtim me skuadrën nga Gjeorgjia, Batumi.
Kjo përballje që i takon xhiros së katërt të Grupit A, zhvillohet sot nga ora 17:00 në Tbilisi.
Bazuar në rezultatet dhe atë që kanë treguar këto skuadra deri më tani në fazën e grupeve, atëherë Trepça llogaritet favorit përball Batumit që i ka humbur të gjitha ndeshjet në Grupin A.
Batumi është i fundit në tabelë me tri pikë pas tri humbjeve, ndërsa Trepça zë vendin e tretë me 5 pikë, sa i ka edhe ekipi nga Greqia, Promitheas që renditet i dyti.
Skuadra e Batumit dy ndeshjet e para, atë me Trierin dhe Opavan, i ka humbur me rezultat të thellë – 92:59, përkatësisht 102:62 kurse në duelin e fundit, u mposht nga Promitheas 91:76.
Krahas Trepçës, sot por prej orës 19:00 luan edhe Bashkimi që në Prizren e pret ekipin nga Franca, Elan Chalon në kuadër të Grupit F.
