Emiratet e Bashkuara Arabe kanë deklaruar se nuk do të lejojnë përdorimin e hapësirës ajrore, ujore apo ndonjë pjese të territorit të tyre për asnjë “veprim ushtarak armiqësor” kundër Iranit.
Në një deklaratë të cituar nga Anadolu, Ministria e Jashtme e Emirateve të Bashkuara Arabe theksoi se është gjithashtu e përkushtuar të mos ofrojë asnjë mbështetje logjistike për asnjë sulm kundër Teheranit.
Ministria tha se Emiratet e Bashkuara Arabe besojnë se “dialogu, ulja e tensioneve, respektimi i së drejtës ndërkombëtare dhe respekti për sovranitetin shtetëror përbëjnë themelet më efektive për adresimin e krizave aktuale, duke nënvizuar qasjen e vendit të Gjirit “për zgjidhjen e mosmarrëveshjeve përmes mjeteve diplomatike”.
Mediat amerikane kanë raportuar gjatë javës së kaluar se Shtetet e Bashkuara kanë dërguar paisje ushtarake në Gjirin Persik, në përgatitje ndaj një sulmi të mundshëm ndaj Iranit.
Të shtunën, Presidenti i SHBA-së, Donald Trump, konfirmoi raportet, duke thënë se një “armadë” amerikane po shkon drejt Lindjes së Mesme dhe se Uashingtoni po e monitoron nga afër situatën në Iran.
Zyrtarët iranianë kanë paralajmëruar se çdo sulm i SHBA-së do të shkaktojë një përgjigje “të shpejtë dhe gjithëpërfshirëse”.
