Kombëtarja e Kosovës në futboll, sot luan ndeshjen e fundit të ciklit kualifikues për Kupën e Botës 2026.
Në stadiumin “Fadil Vokrri” në Prishtinë prej orës 20:45, Kosova do të përballet me Zvicrën në ndeshjen e xhiros së gjatë të Grupit B.
Zvicra i prinë grupit me 13 pikë, 10 më shumë se Kosova që tashmë e ka siguruar fazën “play-off” dhe për t’u kualifikuar direkt në Botërorin 2026, i duhet fitorja me gjashtë gola epërsi.
Çdo rezultat tjetër, konfirmon pjesëmarrjen e Zvicrës në ngjarjen e vitit të ardhshëm që mbahet në SHBA, Meksikë e Kanada.
Si Kosova ashtu edhe Zvicra, të hënën kanë mbajtur seancat stërvitore në stadium dhe konferencat për shtyp, ku kanë shprehur synimet për duelin e sotëm.
Te Kosova, kanë insistuar se synojnë ta fitojnë këtë përballje, duke premtuar maksimumin por selektori Franco Foda ka paralajmëruar ndryshime në formacion.
Në anën tjetër, selektori i Zvicrës, Murat Yakin ka mohuar që kjo përballje kundër Kosovës të jetë “vëllazërore”.
Ndeshja e parë ndërmjet këtyre dy skuadrave, që u zhvillua në muajin shtator pati përfunduan me fitoren e Zvicrës 4:0.
Zvicra ende nuk di për humbje në këtë cikël kualifkues, ku ka regjistruar 4 fitore e 1 barazim derisa Kosova ka vetëm një disfatë karshi 1 barazimi dhe 3 fitoreve.
